AccessBank-ın “151” Ümumi Məlumat Mərkəzi 7/24 rejiminə keçib. Artıq Mərkəz müştərilərin istənilən müraciətlərini fasiləsiz rejimdə cavablandıracaq.
Qeyd edək ki, müştərilər 151 nömrəsinə zəng etməklə, sosial şəbəkələr , o cümlədən WhatsApp vasitəsilə Bankın təqdim etdiyi məhsul və xidmətlər, keçirdiyi kampaniyalar barədə məlumatlana bilərlər. Beləliklə, Ümumi Məlumat Mərkəzinin əməkdaşları müştərilərdən daxil olan sorğuları operativ qaydada cavablandıracaqlar.
AccessBank-ın Rəqəmsal Bankçılıq üzrə İcraçı Direktoru Səbinə Qurbanova bildirib ki, Ümumi Məlumat Mərkəzinin fasiləsiz iş rejiminə keçməsinin əsas məqsədi müştəri məmnuniyyətinin artırılmasıdır: “Bilirsiniz ki, Məlumat Mərkəzi bankın simasıdır. Müştərilərimizin tələbləri durmadan dəyişir və bu tələblər tərəfimizdən yeni addımların atılmasını zəruri edir. Buna görə, müştərilərimizin tələbatına əsasən Məlumat Mərkəzi fasiləsiz iş rejiminə keçib. Başqa sözlə, biz müştərilərimizə daha yaxın olmaq istədik və inanıram ki, buna nail olacağıq. Ümid edirəm ki, bu yenilik xüsusilə bank əməliyyatlarını onlayn rejimdə həyata keçirən müştərilərimizin ürəyincə olacaq. Belə ki, hətta gecə saatlarında bank əməliyyatı həyata keçirən zaman hər hansı bir sualı yaranan müştərilərimiz səhərin açılmasını gözləmədən dərhal Bankla əlaqə saxlaya biləcəklər”.