Azərbaycan Banklar Assosiasiyasının (ABA) təşkilatçılığı ilə “S&P Global Market Intelligence” şirkətinin təmsilçisi tərəfindən “Maliyyə Hesabatlarının Beynəlxalq Standartları 9-un tətbiqi çərçivəsində skorinq modelləri (Scoring models in terms of IFRS 9 implemenation project)” adlı seminar keçirilib.
BBN.az xəbər verir ki, seminar ABA-nın “Daxili audit, mühasibat uçotu, vergi və hesabatlılıq” və “Kredit işi və risk” üzrə Ekspert Qruplarının üzvləri və Qrup üzvü olmayan digər bankların müvafiq nümayəndələri üçün təşkil edilib.
Tədbiri giriş sözü ilə açan ABA-nın Prezidenti Zakir Nuriyev IFRS 9-un tətbiqinin əhəmmiyətini vurğulayıb və bununla bağlı ABA tərəfindən keçirilən seminarlardan danışıb.
Seminar “S&P Global Market Intelligence” şirkətində Risk Solutions (EMEA) qrupunda Əlaqələndirici Direktor kimi fəaliyyət göstərən İnna Popesku tərəfindən keçilib. İnna Popesku banklar, aktiv menecerlər, çoxtərəfli qurumlar və sığorta şirkətləri daxil olmaqla maliyyə institutlarına, sənaye sektorunun geniş spektri üzrə aşağı səviyyəli siniflər üçün daxili reytinq sistemlərini təkmilləşdirməyə kömək edir.
Qeyd edək ki, Azərbaycan Banklar Assosiasiyası (ABA) 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 29 bank və 3 qeyri-bank təşkilatı ABA-nın üzvüdür.