“Kapital Bank” 1 iyun – Uşaqların Beynəlxalq Müdafiəsi Günü ərəfəsində “Möcüzələr xəzinəsi” adlı sosial layihə təşkil edib. Layihə çərçivəsində görmə qabiliyyəti məhdud uşaqlar üçün Azərbaycan dilində nağıllar oxunub, audio kitab formasında hazırlanıb. Layihə zamanı hazırlanan video çarx və fotolar Bankın Facebook sosial şəbəkəsindəki səhifəsinə yerləşdirilib – www.facebook.com/kapitalbank.
“Hər il olduğu kimi bu il də Uşaqların Beynəlxalq Müdafiəsi Günü ərəfəsində növbəti sosial layihəmizi həyata keçirdik. Disk formasında yazlan audio nağılları, Bakıda yerləşən sağlamlıq imkanları məhdud uşaqlar üçün olan 5 nömrəli respublika xüsusi internat məktəbinə təhvil verdik. Həmin nağılları Kapital Bank-ın dəstəyi ilə fəaliyyət göstərən mərkəzin təqaüdçüləri səsləndirib. Tədbirin keçirilməsində göstərdikləri dəstəyə görə Təhsil Nazirliyinə və “Üçüncü Bahar” təşəbbüs qrupuna təşəkkürümüzü bildiririk”, – deyə, Kapital Bank-ın Marketinq departamentinin direktoru Günel Fərzəliyeva bildirib.
Qeyd edək ki, audio disklərə 10 nağıl daxil edilib: “Kompüterin kələyi”, “Tısbağa və dovşan”, “Tülkü və kəklik”, “Sehrli torba”, “Tülkü və xoruz”, “Qarı və pişik”, “Eşşəklə tülkünün dostluğu”, “Siçan və pişik”, “Yeddi nar çubuğu” və “Hatəm və qoyun dərisinə girmiş qurd”. Nağıllar müasir motivli, ibrətamiz və tərbiyəvi xarakter daşıyır.