Ənənəvi olaraq, strategiya uzunmüddətli planlar hazırlamaq və bu planları həyata keçirmək üçün lazım olan tədbirlər və imkanları müəyyən etməklə bağlıdır. Strategiyanın bu cür dəqiq tərifi uzun müddət aktual ola bilərdi, lakin bugünkü dəyişkən, qeyri-müəyyən, mürəkkəb və qeyri-dəqiq dünyada bu tərif artıq dəyişir.
Ətrafınızdakı dünya sürətli bir şəkildə dəyişir, getdikcə gözlənilməz olursa, sistemli şəkildə analiz etmək mümkün deyilsə, necə etibarlı uzunmüddətli planlar qura bilərsiniz?
Bu və növbəti 3 məqalədə bu dəyişkən dünyada strategiyanın hazırlanmasını araşdıracağıq. Bu qısa məqalədə isə əsas məsələ volatil dünyada sizin təşkilatınızın strategiya hazırlamasına qoyduğu tələbdir.
Volatilik sənayedə, bazarlarda və ümumiyyətlə bütün dünyada dəyişikliyin sürətini ifadə edir.Volatilliyi yüksək dünya daha sürətlə dəyişir.
Yüksək volatil bir mühit qısa dövrlərdə prosesi sürətlə sınaqdan keçirməyə və sürətli nəticələr əldə etməyə imkan verən bir strategiya yanaşmasını tələb edir. Bu o deməkdir ki, planlar mümkün qədər tez vaxtda test edilir, həyata keçirilir və əks əlaqə yaranır belə ki, planlar ehtiyac yarandığı anda dəyişdirilə bilir. Yalnız bu halda, bir strategiya yanaşması sənayenin tempi ilə uyğunlaşa bilir.
Bu baxımdan strategiya çeviklik, sürətli sınaq imkanı və sürətli uyğunlaşma kimi xüsusiyyətləri özündə birləşdirməlidir.
Eyni zamanda, strategiya təşkilatınızı sabitliklə də təmin etməlidir. Strategiyanın əsas funksiyalarından biri də təşkilatın fəaliyyətinə nəzarət edən və istinad edəcəyi sabit çərçivə verməkdir.
Daim sabit və ya daim dəyişkən fəaliyyətlərlə təşkilat öz potensialından tam istifadə edə bilməz.
Bu günün tələbi olan strategiyanı “ağac” timsalında izah edək. Şiddətli küləyə davam gətirmək üçün ağac elastik olmalı – əyilə bilməlidir. Lakin eyni zamanda onu qidalandıran və yıxılmadan dayanmasını təmin edən dərin köklərə ehtiyacı vardır.
Deyilənlər strategiyaya da aiddir. Yuxarıdakıları ümumiləşdirərək deyə bilərik ki, bu günün tələbləri strategiyada çevikliyi və stabilliyi birləşdirməkdir.