İxracın şaxələnməsi, idxalın əvəzlənməsi prosesi, eləcə də neftin dünya qiymətinin yüksəlməsi Azərbaycanın xarici sektor göstəricilərinin yaxşılaşmasını təmin edir. BBN.az Azərbaycan Mərkəzi Bankına istinadən xəbər verir ki, cari ilin 9 ayında xarici ticarət balansının profisiti 2 mlrd. dollar təşkil edib. Bu da ötən ilin eyni dövrü ilə müqayisədə 0.5 mlrd. dollar çoxdur.
Ölkənin strateji valyuta ehtiyatları 2017-ci ilin 10 ayında 4.4 mlrd. dollar (11.8%) artaraq 42 mlrd. dolları ötüb. Xarici balansın tarazlaşması valyuta bazarında stabilliyin davamlı xarakter almasına şərait yaradır. Manatın dollara nəzərən məzənnəsi ilin əvvəlindən 4% möhkəmlənib ki, bu da inflyasiya gözləntilərinə azaldıcı təsir göstərir.